И оваа година по петтипат Општина Гази Баба во соработка со Организацијата на жени на општина Гази Баба организира акција за избирање на најубаво уреден двор (градина), најубаво уреден балкон, најубаво уредено блоковско зеленило и најубаво уреден двор на комерцијален и јавен објект. Овој проект е логично продолжение на минатогодишните успешно реализирани проекти за избирање и награда на најубаво уредените зелени и цветни композиции.

Во рамките на проектот ќе се организираат и акции за садење на цвеќиња на јавните површини на територија на Општина Гази Баба. Планирани се акции каде вештите раце на членките на Организацијата на жени на Општина Гази Баба заедно со вработените во Општина Гази Баба цветно ќе уредат две локации. Во изминатите проекти се одржаа трибини за едукација за садење и одржување на цветни и зелени површини, а годинава стекнатото знаење ке се преточи во дело.

Жителите на Општина Гази Баба може да ги пријават своите зелени композиции на наградниот конкурс за избирање на Најубаво уредена градина, балкон, блоковско зеленило и зеленило на деловен објект во Општина Гази Баба. Заинтересираните може да се пријават најдоцна до 30 Јуни, 2011 година во Општина Гази Баба, на бесплатниот телефон 0800 4 22 22 или со порака на мобилниот телефон 072 20 82 84. Изборот ќе го врши стручна комисија, а наградите ќе бидат доделени во текот на месец јули.

Општина Гази Баба се надева дека со вакви проекти во голема мера ќе го поттикне креативниот дух и ќе го мотивира населението да ја озелени и обои својата животна средина, а со тоа и ќе се разубави и општината.